Sunday, February 27, 2011

دماغك دى فيها إيه؟ .. فيل .. فيل

عزيزى المشاهد
عزيزى المستمع
عزيزى المتكلم

اليوم و من سوء حظك أنا مهيس

زى ما تقول كدة دور برد متملكنى و كأنى عامل دماغ قذّافى

لو سألتنى رأسك دى فيها إيه هاقول لك فيل

و بالتالى هاتكلم عن شوية حاجات بمنتهى الصراحة .. و رزقى و رزقك على الله
الكلام غير مرتب و الهدف الوحيد منه أفضى دماغى شوية عشان الفيل ياخد راحته

أولاً: مرتب محمود سعد

الناس ماشية تقول حرااااام .. هو بيعمل إيه عشان ياخد 9 مليون فى السنة؟! ـ

أنا سؤالى .. مين اللى دفع له 9 مليون فى السنة .. و كسب كام من وراه .. و الفلوس دى راحت فين ؟ .. و ليه سمعنا بس اليومين دول عن مرتبه ده؟
و يا ترى باقى المشاهير و المسئولين مرتباتهم عاملة إزاى؟

ليه بدأنا نسمع مرتبات البعض بهدف تحريك الحقد الطبقى الدفين بداخل المواطنين

طالما فى مرتبات بتتقال بقى يبقى نعرف كل المرتبات بتاعة الشخصيات العامة بقى .. الحق حق .. و اللى يمشى على واحد يمشى على الكل

ثانياً : ليه المترو بتاع خط الجيزة غبى؟

بجد سؤال محيرنى .. ليه الباب بتاعه بيقفل بسرعة رغم الزحمة؟  و ليه الباب بتاعه بيقفل زى الطلقة .. بجد شئ غير آدمى بالمرة

ثالثاً: ليه الناس مش بتوسع للى نازل من المترو ؟! .. ليه الناس بتتكتل قدام الباب عشان تطلع .. رغم إن فى ناس عايزة تنزل وأكيد  نزول الناس دى هيفضّى مكان .. و ليه تترازل ؟ ده باب نزول أصلاً؟ ـ

رابعاً : ليه و انت نازل من المترو مش بتنزل بسرعة ؟ ها ؟  فهمنى يا عم المواطن .. ربنا كرمك و شقيت طريقك ناحية الباب و بدأت النزول .. ليه تتلكع بقى ؟ـ

خامساً : ليه لسة بتشترى جرنال الأهرام و الأخبار و الجمهورية؟
طب الأهرام عدد ورقه كبير ممكن ينفعك لو هتشترى عيش و تفرشه عشان تهوى العيش .. إنما ليه الجمهورية؟ـ
ما تفهمنى يمكن عندك وجهة نظر فى الموضوع

سادساً: إنت ليه فاكر المترو هدية عيد ميلاد سيادتك اللى جابهالك باباك ؟
ليه تشغل أغنية و ترغم باقى الناس اللى باباهم ما قدرش يجيبلهم مترو فى عيد ميلادهم إنهم يسمعوها؟!ـ
طب إحنا ضيوف فى المترو بتاعك اللى باباك جابهولك هدية فى عيد ميلادك .. إكرام الضيف واجب يا أخى

و بالنسبة للى باباه ما قدرش يجيب له مترو فى عيد ميلاده و جاب له أوتوبيس
ممكن بردو تعاملنا على إننا ضيوفك و تعرف إن اكرام الضيف واجب

و يا رب يا رب باباهاتكو يجيبولكوا في عيد ميلادكم القادم سماعة أذن (هيدفون يعنى) معلش هى أغلى شوية من المترو و الأوتوبيس بس ما تغلاش عليكم .. و لو ما جابولكوش فعندى ليكم خبر كويس

عايزين نبدأ الحملة القومية لشراء سماعات أذن (هيدفونز) للناس اللى بتشغل الموبايل بصوت عالى فى المواصلات و معهاش فلوس 
تجيب سماعة .. حد مستعد يشارك عشان نكمل سعادة الشباب دول ؟ـ

بالنسبة بقى للكابتن اللى بيطلع باباه جابله مترو بردو و ضحك عليه و فهمه إن دى أوضة نوم؟
يا فندم عيب عيب عيب تركب مع واحدة المترو .. و تقفوا فى آخر العربية بتتكلموا كلام واطى بصوت واطى .. و وشوشكم تكاد تكون لازقة فى بعض .. و إيديك حوالين الأمورة و الحياة بقى لونها بمبى .. يا بابا عيب .. يا حبيبى ما يصحش .. سبت إيه للناس الخواجات .. و بعدين اللى واقفين فى المترو حواليك مش خواجات .. يا كابتن عيب .. إنت و البنت اللى بتتكلم كلام واطى بصوت واطى ستندمون يوم لا ينفع الندم .. دقت ساعة العمل و انتوا قاعدين تتمرقعوا .. إنضفوا بقى جاتكم القرف 

رسالة للإعلام اللى قلب جلده زى الحرباء .. من أنتم ؟ من أنتم ؟

أنا تعبت و الفيل بيصوصو .. جود نايت إفرى بادى

2 comments:

  1. looooooooooool ya bassem :D...waalahy ybny 3andak 7a2:)

    ReplyDelete
  2. looooooooooool ya bassem :D...waalahy ybny 3andak 7a2:)

    ReplyDelete