Tuesday, October 11, 2011

بس أنا كمصرى إتبسطت



النهاردة 11 أكتوبر 2011
كنت راجع فى المترو وكان رايق و جميل على غير العادة .. إستغربت و قلت يمكن حظر التجول إتعدّل و بقى من الساعة 10 بالليل و أنا ما عرفتش

و أنا فى المترو بقى سمعت ناس فى الشارع بتقول هيييييييه .. و فرحانة جداً
إفتكرت سمعوا إن مباريك مات مثلاً .. أو إن اللى ورا أحداث ماسبيرو اللى وقعوا بين الجيش و الشعب إتعرفوا و تم إعلان عقابهم
إفتكرت الحكومة استقالت و استقالتها اتقبلت !! ـ .. كل ده فى حوالى 5 ثوانى .. لحد ما واحد قال : " الزمالك مغلوب "!ـ

فجأةً بقى النسر طار .. و الذبيبة راحت .. عارف .. عامل زى اللى فتح السمكة , ما لقاش الخاتم

وااا لو كنت لسة داخل من البلكونة .. و كنت لسببٍ ما مبيِّت فى البلكونة 3 أيام .. أحب أقول لك إن فريق الفلول جاب جون فى فريق الشعب .. لأ ..مش جون .. دول 25 جون .. و فريق الشعب خسر و جمهوره قعد يعيّط .. يعيّط .. مش عارف ليه الناس لسة بتشجع فريق الشعب ده رغم إنه بيخسر كتير!ـ

بس يا سيدى .. و نزلت من المترو لقيت الشارع فاضى بردو .. ما رضيتش أركب و مشيت و إذ بالقهوة ملياااانة ناس .. قاعدين و واقفين و ناس واقفين على الرصيف التانى بقى و إيه .. تقولش ماتش مصر و السعودية اللى شلنا فيه 5 

و فى اللحظة اللى كنت فيها بالظبط جنب القهوة .. الناس قالت هيييييييه .. و هيصة بقى و ناس عمالة تجرى و تقول يلّا .. عشان تبقوا تتنططوا علينا!ـ

واااا لو كنت لسة راجع من عالقهوة أحب أقول لك إن كان فى مذيع متوتر شوية فى التليفيزيون المصرى قال إن فيه 3 قتلى فى صفوف الجيش المصرى بأيدى أبناء الشعب المصرى .. وااا  فى الحقيقة الراجل عشان كان متوتر و شريط الأخبار بتاع القناة كان مصدوم بردو و بيترعش فالخبر اتنقل غلط .. و جه واحد تانى مش متوتر .. و شريط الأخبار ولاد الحلال جابوله ليمون و مياه بسكّر .. و طلع مفيش حد مات من صفوف الجيش المصرى بإيد أبناء الشعب المصرى!ـ .. معلش يا جماعة .. نساع بعضينا كدة و مافيش حاجة لما القناة تبقى متوترة شوية .. الناس ساعة الغلط تتوتر ظلط

عزيزى الراكب .. المركب اللى إحنا فيها ربنا كتب علينا نكون فيها سوا .. أنا مسلم و الحمد لله و "أهلاوى فى الأعياد و المواسم" و شايف إن اللى بيحصل ده حاجة دمها تقيل و ما تتبلعش الصراحة

بص يا كوتش .. لو كنت لسة داخل من البلكونة بردو فأحب أقول لك إن ولا مؤاخذة المخروبة اللى إحنا عايشين فيها بتتخرب أكتر .. و أنا و أنت مسئولين عن الزفت اللى حال البلد بيوصل له .. ما ينفعش يبقى فى 25 واحد قتلى فى بلدك عشان طلعوا فى مظاهرات و تم بطريقة ما و بفعل فاعل -لا أعلمه - التحريش بينهم و بين قوات الجيش و راح ضحيتها قتلى من هنا و مصابين من الجيش  .. و البلد فيها شحن طائفى غير عادى .. و حزن فى قلوب كتير من المصريين .. و كراهية و إحساس بالقهر .. و خوف فى دماغ ناس كتير من إن الإيد الواحدة ما ترجعش إيد واحدة .. و تبقى إنت قاعد متوتر و مشدود عشان الماتش أوى كدة

للدرجة دى الإعلام بتاعنا بقى فاهم قطاع كبير من الشعب و عارف إيه اللى بيسكته و يقعده فى بيته و بيلاعبه بيه زى اللى بيلاعب عيل صغير بشخشيخة .. أنا آسف للتعبير بس هو أقرب ما يكون للحقيقة

النهاردة كنت فى شدة الأسى لأن بالشكل ده قلقت على الإنتخابات .. الشعب اللى عنده ضحايا و مش حاسس بيهم مش صعب إنه يدى صوته لفلان الفلانى عشان هيقفش منه خمسين جنيه و هو خارج ولّا أخد منه وعد إنه هيشغله على ميكروباص .. لأ .. ما تفهمنيش غلط .. أنا مش قصدى عليك إنت .. إنت راجل كويس .. أنا باتكلم على الراجل اللى واقف على الرصيف التانى

على رأى يسرى فودة .. استقيموا يرحمكم الله

0 comments: