Thursday, June 10, 2010

الكتاب المسموع

مدونة قيّمة فيها كتب صوتية عربية رائعة

2 comments:

Wednesday, June 09, 2010

تلاقى أمك اللى جايباهالك

معلش الكلام طويل شوية , بس مهم و أنا نادراً ما باكتب حاجة مهمة
:D
مش عارف إيه سر إصرار الشركات الكبيرة على إعطاء الفرص لأوائل الدفعات دون غيرهُم من البشريين
ده مش حقد على أوائل الدفعات إطلاقاً .. هم يستاهلوا كل خير .. دول ناس زى الفُل
بس يعنى فى فئة من البنى آدمين بتعيش و تتعايش و بتعمل حاجات تانية غير إنها تطلع أوائل دفعات يعنى
العلم ده بلا شك نعمة من ربنا سبحانه و تعالى و مش هيكافئ بيه حد إلا لو كان يستاهل و اجتهد عشان يحصّلُه
بس ناس كتير من اللى عملوا تغيير فى العالم ما كانوش أوائل دفعات يعنى أو حتى متفوقين أو حتى كملوا تعليمهم الجامعى
أو حتى اتعلموا فى جامعة

أنا شايف الموضوع فى الأساس
passion
يأتى بعدها
skills + knowledge

يعنى .. كان حد قال لى قبل كدة .. مفيش حد بيبقى مبسوط بالشُغل اللى بيعمله كله .. الحياة مش حلوة أوى كدة
اللى بيتميز فى الحتة دى بقى دوناً عن الآخرين هم زملائنا المتفوقين
الناس اللى بتعرف تضغط على نفسها و تذاكر حاجات هى مش طايقاها و عارفة إنها ما تساويش فى سوق العمل 3 ملّيم
و تحل مسائل و تتابع فى المحاضرة و السكشن .. و لو سألت بعضهم على المادة هيقول لك دى زبالة و ما لهاش لازمة .. بس لازم تتذاكر
أنا بيعجبنى الجزء ده فيهُم و الله و أعتقد دى أكتر حاجة (بعد كونهم أذكياء فعلاً) بتعجب الشركات بردو .. موضوع الاجتهاد ده
أنا مدير و هادّيك task مش عاجباك و مش هتتعلم منها حاجة .. و مش ممتعة .. بس هتعملها عشان هى لازم تتعمل
طبعاً هابقى مرتاح نفسياً لما أدّيك أى task لأنى عارف إنك هتعملها .. بغض النظر عن حالتك النفسية .. لما تاخد المرتّب هتنسى كل الآلام دى :D ـ

---------------------------
تانى حاجة .. موضوع تعدد المواهب

فى كام واحد أعرفهم عندهُم كميّة مواهب تخليهُم يودّعوا العمل الهندسى و هم مرتاحي الضمير
و فى ناس موهبتها هى الهندسة .. إتخلق عشان يبقى مهندس .. يمكن أنا مش واحد منهُم :D ـ بس قشطة i'm satisfied
أنا بازعل فعلاً على المواهب اللى ما بتظهرش و بتندفن مع أصحابها اللى المجتمع عندنا بيفرض عليهُم يعيشوا إسطمبة معينة
لحد ما يموتوا و اللى بيفلت منهم من الاسطمبة دى هو اللى بيعيش حياتُه فعلاً

----------------------------

ثالث حاجة .. موضوع الـ Quality vs Quantity
أنا بطئ شوية فى الفهم
و ذكائى قد يكون أقل من متوسط ذكاء معظم زملائى
بس بانبسط جداً لما أفهم حاجة كويس و أعرف أشرحها لحد
لما تشرح حاجة لحد بقى لازم تـ start with the end in mind بمعنى
أنا هاشرح للأشكال دى ليه :D .. لو عشان أحلل المُرتّب فالمُرتب هيبقى حلال أكثر لو قلت لهم ما فيش محاضرات و المنهج self study من كتاب كذا و أنا هاستقبل منكم إيميلات كل أسبوع بالأسئلة و أرُد عليها
أفضل بكثير من إنى أجيبهُم فى الزحمة و أضيع و قتهُم فى محاضرة مملّة و نص كلامها مُعاد و النُص التانى حل معادلات رياضية بطريقة ينفُر منها ذوى الطبائع السليمة
نرجع لـ start with the end in mind ـ لو أنا بقى داخل و هدفى الناس دى تفهم يبقى أنا مطالب بإنّى أذاكر كويس أوى و اتمرّن كويس أوى على توصيل المعلومة و إعرف إزاى أشرح نسبية لطفل فى ابتدائى و أقدر أخليه يفهم فعلاً و يفضل فاكر المعلومة طول عمرُه
النظام التعليمى عندنا يعانى من أنيميا حادة و قرّب يموت
الطلبة مشكلة كبيرة (و أنا منهُم ) بس يمكن يكون النظام السبب فى المشكلة دى أصلاً
ماهو معظمنا بنحب أفلام الكارتون
لو المُحاضرة و المادة العلمية بقت ممتعة زى أفلام الكارتون هنحبّها أكيد بردو
هييجى حد يقول لى أنا وظيفتى ادرّس مش اعلّم .. يعنى أنا أدرّس و انت تتعلم
ماشى .. بس تخيل إنك بتحكيلى فيلم و قلت لى فى الأول ياااااااه .. ده لذيذ جداً .. و انت بتحكى بقى انا حسيت من كلامك إن هو ممل .. يبقى فاكس الفيلم .. ده فيلم غبى أساساً .. ده إنطباعى بعد ما انت فشلت فى إنك تحببنى فى الفيلم
يبقى كان أفضل إنك ما تحكيش حاجة و تسيبنى اشوف الفيلم مع نفسى أو أخلى حد تانى يحكيهولى و يعرف يحببنى فيه

بعد كده بقى يظهر مفهوم الـ quantity vs quality ـ
أنا ضد إن الدكتور يبقى ماضى على syllabus لازم يلتزم بتدريس 80% منه على الأقل
و فى نفس الوقت أنا ضد إن ما يبقاش فى feedback من الطلبة للدكتور و للجامعة بخصوص الدكتور و المنهج
فى الآخر موضوع الـ syllabus ده بيزنُق الدكتور و بيخليه يجرى .. الطلبة مش فاهمة بس خدوها .. اللهم بلّغت .. اللهُم فاشهَد .. و حسبى الله و نعم الوكيل .. دى الدكتور بيقولها فى الجامعة و الطلبة بتقولها فى الدكتور و الأهالى بتقولها على طول
:D

أنا مش عارف الدكاترة واخدين بالهُم ولا لأ إن نهضة البلد دى مش هتتم غير بمجهود كبير أوى منهُم .. المجهود اللى يخلى كل الشباب يجتهد و يحب اللى هو بيعمِلُه .. زهقت من اللوم على الجيل بتاعنا ده بإنُّه فاشل و بتاع هلس
إحنا عندنا أحسن ناس بتشجّع كورة .. عشان بتحب الكورة و بتفهم فيها
خليهُم يحبّوا المادة و تأكد إنهُم هيبقوا أحسن ناس فيها
مش كفاية تحسسهُم إن المادة مهمة .. أنا مثلاً عارف إن التنس رياضة كويسة و جميلة و فيها فنّيات رائعة ساعات باحب أشوفها فى لقطات على اليوتيوب .. بس استحالة أقعُد أتفرج على ماتش تنس 3 ساعات .. عشان أنا مش باحب التنس .. فى نفس الوقت أنا ممكن أقعُد أتفرج على خطاب لمدير فى جوجل أو أبل عن الحاجات الجديدة بتاعتهُم ..
حتى لو ساعة كاملة فى ليلة امتحان .. عشان أنا باحب كدة ..
make me love it .. get my best
أنا كدة .. أنا عاجب نفسى كدة

-----------------------------------

رابعاً .. الفتايين الواثقين من نفسهُم
من اسباب إنى أحياناً مش باستوعب المعلومة بسرعة ( أحيان كثيرة يعنى ) إنى عانيت من الفتايين اللى بيبقوا واثقين أوى و هم بيفتوا
بص يا معلم .. هتفتى .. قول فى أول كلامك .. أعتقد .. أظُن .. متهيألى .. لكم ما تبقاش جملة خبرية مؤكدة بـ إنّ و أخواتها و فى الآخر تطلع هجّاص و بتألّف
بجد بقيت بأخُذ معظم المعلومات على إنها خطأ إلى أن يثبُت العكس
إنتوا هتجننونى قريب
:'(
إتقوا الله و بطّلوا فتى بقى أو حتى قولوا قبليها و الناس هتحترمكم و الله

--------------------------------

خامساً .. ده يمكن عيب فيّا إن انا باحب إنك لو هتقول لى معلومة تقول لى الحقيقة كاملة
مثال محلول: هات لى طبق من المطبخ :D ـ
دى بتمثل لى أزمة بمعنى الكلمة
طبق زجاج ولا بلاستيك ولا stainless
و كبير ولا صغير
و غويط ولّا مسطّح
ليه .. عشان باحب أعمل الحاجة صح من أول مرّة
أنا ربنا خلقنى كدة
297;
يبقى سلّمنى نضيف أسلّمك نضيف
قول طلبك بالظبط و انا البيه لك و أنا قرير العين
و نبقى كلنا مبسوطين فى الآخر

------------------------------------

سادساً .. عن العشق و الهوى
:D
بص يا ابنى إنت و هو .. لو انت متخيل إن أنت فعلاً بتحب الإنسانة دى و ما تقدرش تعيش من غيرها
هاقول لك وصفة سحريّة تعرف بيها ممكن تبقى سعيد لو ارتبطت بيها و لا لأ
:D
تخيل الإنسانة الجميلة اللى انت معجب بيها دى بعد 20 سنة .. بقت بدينة بشكل غير طبيعى و وجهها مليان تجاعيد بقى و طبعاً إنت بردو لسّة شَب و عايز تروِّش
:D
لو تقدر تعيش معاها و تكن ليها كل التقدر و الإحترام و الحُب فى موقف زى ده يبقى ندخُل على الاختبار التانى .. لو لأ يبقى إنسى عشان ربنا يكرمك
:D
الاحتبار الثانى
تخيل لا قدّر الله إنك ارتبط بالانسانة دى فعلاً و بعد الخطوبة مثلاً فقدت جمالها الشكلى بطريقةٍ ما .. ربنا يبعد عننا كلنا الشر
هيبقى إيه موقفك ؟ هتتجوزها بردو و لا هتفكس .. لو هتفكس يبقى إفكس من دلوقت
من الآخر اللى عايز أقوله الموضوع مش إرتباط واحد امّور بواحدة امّورة - يا ريت اللى يعرف أصل كلمة أمّورة يبعت لى ـ
أنا شايف إن معاناة ناس كتير من اللى اتجوزوا حاصلة بسبب الموضوع ده
ـ إنتى كنتى غير كدة قبل الجواز .. إيه اللى غيرِك ـ , و _ يا واخدة القرد على مالُه يروح المال و يبقى القرد على حالُه ـ
لكن لو واخداه على أساس إنه قرد و مش طمعاً فى فلوسه يبقى مبروك عليكى أحسن قرد فى الدنيا :D و إن شاء الله تعيشوا فى سعادة و هناء
و لو انت متجوز روح ( حاسس باشباح بتحوم فى المكان )  يبقى تأكّد إن الروح مش هتموت حتى لو الشكل اتغيّر (أعوووووووووو) ـ

على فكرة أنا مش باتفرّج على الأستاذ أسامة منير (هو اسمُه كدة فعلاً؟ ) و مرة سمعت مكالمة بالصدفة و انا باقلّب فى الردايو بالليل و كان فى شاب بيعيّط فى التليفون بيقول له انا بحبها و هى بتحبنى بس واحد صاحبى وقّع ما بيننا و خلاها تحبُه هو و أنا مش قادر أعيش من غيرها و قعد يعيّط .. يعيّط
أنا قلت لنفسى هو فى كدة .. ما تسترجل يلا  ـ شاب (هو يرى )* صحيح
:D
*استخدم جوجل لترجمة ما بين الأقواس و احذف الضمير و انت تعرف قصدى .. أيوة برافو عليك عرفتها من غير جوجل
إدّى نفسك +1 ... ـ
----------------------------------------------

سابعاً .. تلاقى أُمَّك جايباهالك
أنا مش عارف ليه معظم الناس رأيُهم إن أى شاب صغير سايق عربية تبقى أمه اللى جايباهالُه
مع إن فى احيان كثيرة بيبقى أبوه اللى جايبهالُه .. آه و الله .. طب إنت تعرف مين أمُّه هى اللى جايبالُه عربيتُه؟
فى حين إن فى شباب كثير بردو بيشتغل و بيتعب عشان يجيب العربية و يصرف على نفسُه و يصرف على أمُّه
لكن تعمل إيه بقى فى ثقافة إن الأغنياء كلهم ولاد $@#  حرامية .. اللى مش هتتغيّر
و بعدين إنت تزعل ليه لو أمُه هى اللى جايباهالُه ؟! ـ

الكلمة المحذوفة هى إسم حيوان ينبح .. برافو عليك .. عرفتها .. أنا ما رضيتش أكتبها فى السياق عشان ما نشيلش ذنب الشتيمة

-----------------------------------------------
that's all for now , sorry for the loooooong entry .. but i believe it's one of my best
سبحانك اللهم و بحمدك أشهدُ أن لا إله إلا أنت أستغفِرُك و أتوب إليك

السلامُ عليكُم

9 comments:

Sunday, June 06, 2010

Web programming : University of Washington

link to the course
http://code.google.com/edu/submissions/uwspr2007_webprogramming/listing.html#_lectures

0 comments:

Friday, June 04, 2010

خواطر 2[13-آخر أسبوع في حياة الحبيب ]لأحمد الشقيري

0 comments:

خواطر شاب 1 [01-أين تجد السعادة ؟] لأحمد الشقيري

0 comments:

Wednesday, June 02, 2010

عدوّنا الأبدىّ


و لتعلم أننا بصدد عدوٍّ قذر لا يتورع عن فعل أى شئ ليسود .. و لتعلم أن المال لعبتهم و الإعلام يدهُم اليُمنى .. و لتعلم أنه لا مفر منهُم و أن السلام معهم لن يكون و إن كان فلن يدوم .. إنهم تاركيك حياً لأنك مصابٌ ضعيف .. ستبقى تقطر دماً و تذبُل حتى تموت .. فلِم يبذلوا جهداً فى مواجهتك ؟! .. لقد جعلوك تابعاً لنفسك عبداً لشهواتها لا ترجو من الحياة إلا المال و النساء و الشُهرة و إن يروا منك بوادر نهضة .. سترى وجههم الحقيقى الذى هو ألعن من وجوه الأبالسة .. و إن تراه و أنت تسعى للنهوض خيرٌ لك ألف مرة من أن تراه و أنت تسقُط من الإعياء و الذُل تحت نعالهم

0 comments: