في البداية الحمد لله رب العالمين. والصلاة والسلام على خاتم المرسلين مُحمَّد الصادق الأمين
ثم أمّا بعد ….

الواحد مخنوق الصراحة وهيفرقع .. ولو فضل كاتم في قلبه هيفرقع أسرع

المهم .. ندخل في المفيد .. خمس حاجات صغيرة محشورة في الدماغ وهتشوف طريقها للنور :)

الأوّل:
الصراحة كنزٌ لا يفنى
 

بفضل الله أنا إنسان صريح .. مع كل الناس .. وإن شاء الله لما ربنا يكرمني وأتجوّز هاكون صريح مع مراتي وعيالي .. باحب الناس تكون صريحة معايا وما تحوّرش عليا .. الشخص الصريح المباشر صادق اللهجة ده فوق راسي حتى لو متضايق مني أو طلّعني غلطان في حاجة .. مشكلتي في اللي يستصغر عقلي ويحوّر عليّا ويشتغلني .. حتى لو هيمدح فيّا .. المحلسة والنفاق عمرها ما كانت حاجة تبسط أي حدى بيفهم.
الممهم .. نكمّل
أنا في نيتي بردو بإذن الله لما يبقى عندي شركة بتاعتي هاكون صريح مع الموظفين .. وهاقول لهم لو في مشاكل بتواجه الشركة ولو في أوقات أنا اكتشفت فيها إني كنت غلطان وإن قراري كان خطأ هاقول لهم .. ده حقهم عليّا ..
ليه؟
لأن الهروب من مواجهتهم بيخلق جو من الشك في نفسهم .. ويقعدوا يسألوا نفسهم ويسألوا بعض أحياناً:
“هو فين .. مختفي ليه؟” .. “هو بيعمل إيه؟” .. “هي الدنيا كده خلاص ولّا إيه؟” .. وهكذا….
طب ما أنا ممكن أحوّر عليهم بأي هري ….
حتى لو انت مش شايف فيه مشكلة أخلاقية .. التحوير مش هيجيب نتيجة .. الناس دلوقت أذكى من إنك تضحك عليهم بشوية أونطة.
طب وأقول لهم الحقيقة ليه .. بالذات لو الوضع سيء؟
أنا مقتنع إن وقت الشدّة هو وقت اختبار معادن الناس .. الناس اللي تقدّرك لما تصارحهم ويقفوا جنبك ويحاولوا يقدموا حلول لمشاكل الشركة دول كنز لازم تعتز بإنك تعرفهم وبتشتغل معاهم. والناس اللي تسيبك وتهرب أول ما تصارحهم بإن الشركة ممكن تدخل في أزمة دول قلة معرفتهم أحسن. لكن صمتك يعتبر خسارة ليك في جميع الأحوال .. الناس اللي بتشيل وقت الشدة بتتضايق منك عشان عاملهم أكياس جوافة .. والناس اللي مش بتشيل في وقت الشدة قلقهم بيزيد أكثر والطاقة السلبية بتبقى للركب.

الصراحة فعلاً .. في العلاقات الشخصية وعلاقات العمل (بالذات مع موظفينك) كنز لا يفنى.

الثاني:
هو الغباوة بتيجي مع كبر السن والترقّي الإداري ؟
 

أسئلة بتيجي في بالي كتير .. هم ليه بيعملوا كده؟ .. هي الناس دي مش شايفة اللي العيال الصغيرين شايفاه ؟ .. هو مقتنع إن الهبل ده هيجيب نتيجة؟ .. وهكذا…
الموضوع مالوش إجابة واضحة وصريحة عندي .. هي مجرد تخمينات..
أعتقد إن لما سنك بيكبر بتبدأ تنشغل بساقية وتدور فيها .. وتهمل حاجات كتير زي إنك تتعلم كورس جديد أو تقرأ في كتاب يومياً أو أسبوعياً .. وبتبدأ لما تفضى تنشغل بالفيسبوك والهبل اللي عليه بدل أي حاجة مفيدة .. توقفك عن القراءة والتعلُّم ده مصيبة .. لأنك كصانع قرار محتاج إبداع وإطّلاع .. وده مصدره مش الفيسبوك والهري اللي عليه.
من أنجح رجال الأعمال في العالم چيف بيزوس رئيس شركة أمازون .. وده دودة كتب .. يا رب أبقى رُبعه في حب الإطلاع ونضافة الدماغ. وبإذن الله مش هابطل قراءة وتعلُّم طول ما أنا عايش :)

الثالث:
تعرف أسطورة إرچنتيف ؟
تعرف أسطورة سيزيف؟ (ملحوظة أخي السلفي.. اللي مطلعين الأسطورة أصلاً كفرة فعدّيها) ..
المهم سيزيف ده كان واحد غلط في حاجة والآلهة عملت له عقاب إنه يطلّع صخرة لأعلى قمة في الجبل وأول ما يطلّعها الصخرة تتدحرج وتنزل لسفح الجبل .. ويفضل يعيد في المهمة دي دايماً بدون توقُّف.

مين بقى إرچنتيف ؟
ده واحد الله أعلم غِلِط في إيه .. بس المانچمنت قررت تعاقبه بردو ..
وكان العقاب إنهم يدولوا تاسكات .. وكل تاسك يدوهاله يقولوا له خد بالك دي إرچنت urgent .. وساعات very urgent
وكان بياخد التاسك ويعملها بسرعة ويطلّع المطلوب ويبعته وبعدين يكتشف إنها ماكانتش urgent ولا حاجة!!

الرابع:
طب رد عالبتاع يا أخي! 

كان في حركة بلدي كده بتعملها الستّات العواجيز في الأفلام والمسلسلات لما تعمل نفسها مش سامعة الكلام اللي بيتقال .. وتسمع بس الكلام اللي عايزة تسمعه وترد عليه والباقي تعمل نفسها مش سامعاه .. في ناس بتتصرف مع الإيميلات والرسايل بنفس الطريقة .. حركة بلدي جداً جداً ومش حلوة خالص!

الخامس:
لواحد معين ماقابلتوش قبل كده ونفسي أقابله .. بص يا عم الحاج
 

أنا ماقابلتكش قبل كده بس عايز أول ما أقابلك أبوس راسك .. طبعاً هتقول إيه الواد المجنون ده .. معلش يا حج أبوس راسك وبعدين نتفاهم :)) .. أنا نفسي أقابلك النهاردة قبل بكرة والله يا حج وحبيتك من قبل ما أشوفك :))
ومن حيث مجنون فأنا على وشك الجنان آه :)) .. فصحصح معايا كده وركّز عشان خاطر نحب بعضينا أنا وانت :)) .. ربنا ما يخيبش أملي فيك وفي مخك الكبير :)

المصدر الأصلى للصورة مصراوى

"معايا هدايا اسكندرية  و يا سلام على اسكندرية و حلاوة اسكندرية و جمال اسكندرية و جمال هدايا اسكندرية .. معايا الشنطة الحرير .. تشيلى فيها البصل و التوم .. تشيل فيها العيش و تهويه .. الشنطة الحرير .. ولا البلاستيك و أضراره  .. الشنطة الحرير .. ولا .. تتقطع منك و انت ماشى .. ولا .. يعرق منك العيش و يبوظ فيها .. ولا .. البصل و التوم يبقوا مكتومين و يبوظوا .. الشنطة الحرير .. هدايا اسكندرية .. الحق قبل ما العرض يفوت .. الشنطة باتنين جنيه و بس .. ولا .. استغلال المحلات .. ولا .. التدوير عند بتوع الخردوات .. معانا الشنطة الحرير .. اتفرج على هدايا اسكندرية و حلاوة هدايا اسكندرية .. اتفرج يا بيه .. اتفرجى يا مدام .. ولا .. تندم لما أنزل من العربية .. شنطة هنا للمدام .. تحبّى لون إيه يا ست الكُل .. الله .. أحلى لون لست الكُل .. واحدة هنا كمان للأستاذ .. عينيا .. إلحق هدايا اسكندرية .. الشنطة الحرير"

بهذا الاستعراض يجذب هذا البائع الجائل أنظار مستقلّى عربة المترو و يغادر بعد أن يبقى فى نفس عربة المترو لمحطتين متتاليتين .. فى العادة الناس يشترون منه ولا يتركوه يغادر العربة إلا و قد "نفّعوه" .. هذا البائع أسلوبه فريد و لعله أهم سبب لشراء الناس منه .. كلمة "ولا" -التى يستخدمها للفت أنظار الركاب- يقولها و كأنه ينادى أحداً فى آخر العربة .. هذا نموذج فذ فى فن البيع للجمهور يتعلم منه من يريد أن يتعلّم و يستعلى عليه كل متكبّر جاهل.

"معايا سبيطر مان .. ترميه عالحيط يتشقلب .. عالشباك يتشقلب .. ترميه عالباب يتشقلب .. معايا سبيطر مان .. سبيطر مان العجيب .. هادى الأولاد و فرحهم .. هديّة حمادة و رشا .. سبيطر مان .. بجنيه واحد بس .. أيوة يا بيه .. أيوة يا مدام "

لم أخطئ فى الكتابة .. هو ينطقها هكذا "سبيطر مان" .. هذا الرجل لديه ذكاء بيعى فريد .. لديه وحدات من ذلك الـ "سبيطر مان" يقوم بإلقائها على باب المترو أحياناً و بجوار الشباك أحياناً أخرى ثم يتركها تؤدى نزولها البهلوانى على الجدار بشكل يلفت الأنظار .. و لكن ما الذكاء فى هذا ؟ .. الذكاء أنه يلقى هذا الـ"سبيطر مان" على جدار يقف أو يجلس بجانبه أطفال .. فما أن يرى الطفل السبيطر و هو يتحرك بهلوانياً حتى يلح على أبيه أو أمه كى يشترى/تشترى له واحداً .. و ما أن يشترى هذا الطفل حتى تبدأ عدوى شراء الـ "سبيطر مان" بين أطفال العربة انتشار النار فى الهشيم .. ما يعرفه أهل المبيعات بالعرض التجريبى المباشر-Live Demo- يقوم به هذا الرجل و باحتراف و هو يعرف جيداً زبونه المحتمل و يذهب ليؤدى هذا العرض التجريبى بجواره مباشرة لكى يرفع لديه الرغبة فى الشراء لا يستطيع معه الزبون المقاومة أو بالأحرى لا يستطيع والده و والدته المقاومة.

"اتفرّج يا بيه .. اتفرجى يا مدام .. إتفرجى يا آنسة .. إتفرّجى يا مزمزيل .. معايا المقوار السحرى .. مقوار للبتنجان و الكوسة و البطاطس .. المقوار العجيب .. مقوار المحشى السحرى .. قوّرى حلّة البتنجان و الكوسة فى عشر دقايق بس و مافيش واحدة هتبوظ منّك .. الطريقة سهلة خالص"

بهذه الجملة يفتتح هذا البائع حواره مع الركاب و سلسلة المبيعات التى سيقوم بها .. يدخل إلى العربة حاملاً شنطتين .. إحداهما بها عشرات المقوارات السحرية .. و الأخرى بها بتنجان و كوسة و بطاطس .. الرجل أحضر معه أدوات العرض التجريبى المباشر و لا يستغرق دقيقة إلا و قد بدأ عرضه المباشر .. يخرج ثمرة بتنجان و يبدأ بالشرح

" تجيبى البتنجانة كدة .. إقطعى الراس .. و حطى سن المقوار .. و لفّى فى ناحية واحدة خمس لفات كده .. و اسحبى المقوار هتلاقى القلب كله طلع فيه بالشكل ده .. و البتنجانة جاهزة للحشو على طول .. نجرّب الكوسة "

و يجرّب الكوسة و يبهر الناس كما أبهرهم فى حالة البتنجان ..  يسارع الناس بإخراج النقود لشراء هذا المقوار السحرى فكلهم يريدون توفير الوقت و المجهود المبذول فى "التقوير" .. يطلب منه البعض أن يشترى المقوار الذى يستخدمه هو فى العرض التجريبى فيرفض و يقول له " أجرّب لك اللى تشتريه يا بيه إنّما ده مش للبيع" .. يبدو أن المقوار السحرى الذى يستخدمه هو ذو جودة أعلى من المقوار السحرى الذى يشتريه الناس .. منهم من يقبل و منهم من يشك و لا يشتريه

الجدير بالذكر أن الباعة الجائلين ممنوع تواجدهم فى عربات المترو و لكن كما رأينا هم كُثُر .. بالنسبة لموقفى من تواجد باعة جائلين فى المترو فإننى ضد وجودهم كباعة "جائلين" .. أنا مع تواجد أماكن لهؤلاء فى المحطات كباعة دائمين لإثراء النشاط التجارى و مع إخضاعهم لإشراف و رقابة .. هؤلاء الباعة يا سادة لديهم من المهارات ما يستحيل معه أن أطالبهم بالتوقف عن البيع فهم مازالوا يطلبون رزقهم بالحلال

الكلمة التى أود أن أختتم بها أننى لم أذكر كل نماذج الباعة الجائلين التى رأيتها فى المترو فى تلك التدوينة فهى نماذج كثيرة و منها أمثلة متفرّدة .. كبارقة أمل فى وسط الظلام فإننا لدينا أشخاصاً موهوبين فى فن البيع رغم أن الكثير منهم يبدو عليه أنه لم ينل حظّاً كبيراً من التعليم .. و لكن مدرسة الحياة علمت هؤلاء الكثير.

كبارقة أمل أخرى .. رأيت الفقراء يشترون من الفقراء -"عشان ينفّعوهم"- .. شكل من أشكال التضامن الإجتماعى بين الفقراء و بعضهم لا يفهمه المتعالين المتغطرسين اللذين يتشدقون بحقوق الإنسان و حقوق الفقراء فى القنوات التليفزيونية المختلفة و هم أبعد ما يكون عن الفقراء .. الغنى يا سادة يأتى من الاستغناء .. اللهم اكفنا بحلالك عن حرامك و اغننا بفضلك عمّن سواك و اغننا بكرمك عن سؤال اللئيم

السلام عليكم

Today I met this nice picture about entrepreneurship from MIT Entreprise Forum, Pan Arab Region.

Actually you might think of entrepreneurship as a way of living a restful life where you are the master and all your wishes come true. If this is your imagination please do yourself a favor and look for a full time job.

Entrepreneurs suffer much more than employees. It's NOT easy AT ALL to live as an entrepreneur. Cause this brilliant quote is so true

" Success is like pregnancy, everybody congratulates you when you're pregnant but nobody knows how many times you were fu#ked to achieve it "

Same here with entrepreneurship. You fail 100 times and nobody knows or cares but when you make it everybody thinks that you're lucky. It's not about luck, you just don't see the failures which by all means are much more than the successes.

If you're not ready to fail and fail and fail and try harder and smarter every time then don't waste your time, DO YOURSELF A FAVOR AND GET A FULL TIME JOB!

مملكة المترو - الحلقة رقم 2

جناب الكوماندا المهم

" أيوة يا عماد .. لأ قل له أنا زعلان منه يا عماد .. أيوة قل له كدة .. قل له أخوك محمود ليه بيت يا عماد .. لو عايز تسأل على أخوك محمود تعالى زوره فى بيته يا عماد .. أيوة رمضان داخل أهه و الباشا بيعزمنى أول يوم فى رسالة محمول .. أنا أخوه الكبير و المفروض هو ييجى عندى أول يوم .. لأ يا عماد .. ألو .. ألو .. ألووووو .. يا عماااااد .. يووووه .. الله يخرب بيت الشبكة الزبالة " ~ محمود لأخيه عماد عن أخوهم الثالث مجهول الهويّة

لا .. ليس هذا تفريغ مكالمة محمود لعماد من إحدى سجلات أمن الدولة التى تم تجميعها من إحدى المفارم .. إنه ما سمعه ركّاب المترو اللذين تصادف وجودهم فى نفس عربة المترو .. نفس المترو .. نفس المحافظة التى يتحرك بها المترو الذى يُقِل محمود من مكان عمله إلى مكان سكنه. فمحمود لديه مشكلة صغيرة لا يلاحظها إلا شخص دقيق الملاحظة جداً. محمود لديه  فى فمه و حنجرته مكبِّر صوت داخلى يابانى أصلى بتاع بلده.

هل المشكلة مشكلة عماد و محمود و أخيهم الثالث فقط ؟ .. لا .. لقد رأيت من عيّنة محمود الكثير .. حيث لا أسرار .. لا شئ يخفى على الشعب .. أنا كتاب مفتوح .. كتاب صوتى مفتوح إن جاز التعبير .. أنا لا أرتدى الواقى  ـ لأ ده واحد تانى اللى قال دى ـ .. المواطن من نوع جناب الكوماندا المهم ,الذى يمثله هنا محمود, لا يدرك ببساطة أن لديه مشكلة كبيرة فى إدراك الفرق بين العام و الخاص .. بين السر و العلانية .. بين مكالمة شخصية لأخيه أو خطيبته أو صديقه و بين إذاعة الشرق الأوسط و تعليق الكابتن محمود بكر .. وااااا لو كنت لسّة داخل من البلكونة فباقول لك إن عماد خطّه بودافون :)

المشكلة ليس المقصود بها ضعاف السمع لا سمح الله .. المقصود بها ضعاف الإحساس .. فهم يسمعون دبّة النملة حولهم و لو كان شخصين يتكلّمان بالقرب من جناب الكوماندا المهم فإنه يُظهر تأففاً عندما يرتفع صوتهما قليلاً أثناء إنشغاله هو بمكالمته .. و لا يدرك أن صوته يسبب أزمة فى المكان كلّه

جناب الكوماندا المهم ليس فقط متكلّم فى الهاتف المحمول .. فأحياناً يكون مستقلاً المترو مع زوجته .. يتكلمان معاً على زوجة أخيه بصوت عالى و كيف أنها بجحة و سقيلة و عديمة الإحساس و تكرههم و تحسدهم و مغرورة و اسمها صفاء و ساكنة فى رمسيس و تليفونها أوله 012 ..  لا تتخيل كمية التفاصيل و الفضائح التى ينشرها هؤلاء .. و الملحوظ أن معظم ذكور الكوماندا يتزوجون كوماندات .. كلاهما عالِ الصوت و على لسانه تجرى أخبار الأمم بلا حرج ولا كلل

جناب الكوماندا المهم ليس فقط فى المترو .. هو فى جميع أنواع المواصلات العامة .. فى الشارع .. فى العمارة السكنية التى تعيش فيها .. إنهم فى كل مكان .. تحضرنى مقولة أحد الممثلين "إنت فاكر إن أنا الوحيد اللى كدا .. إحنا كتير أوى"ـ

فعلاً جناب الكوماندا المهم موجود كتير أوى و لا بُد من جهود رادعة للحد من انتشار هذه الظاهرة الكونيّة .. شغّل يا ابنى أغنيّى يبقى انت أكيد أكيد فى مصر 

حقّاً لا أدرى هل هى مشكلة نفسيّة و حب للظهور أم أنه نوع من البلاهة المبالغ فيها .. لا إهانة لضعاف السمع إطلاقاً لأن معظم من رأيتهم من ضعاف السمع لديهم حس و ذوق أكثر من كثير من صحاح السمع.

تعتقد المشكلة سببها إيه و ممكن يكون حلّها إيه ؟

تعليق هامشى: بعد غياب طويل جداً عن الكتابة فى سلسلة مملكة المترو بييجى البوست ده .. إعذرنى على الخليط الواضح بين الفصحى و العاميّة .. أريد أن أكتب كل الكلام بالفُصحى و لكن العاميّة أحياناً بتوصّل اللى عايز أقوله أفضل يا سيّدى :)

السؤال .. هل إنت شايف أن مملكة المترو دى بتضيف ليك حاجة ولّا بتحس إنّك بتضيّع وقت لمّا تقرأها ؟

التعصُّب أحياناً بيوصل لدرجة التعصب الأعمى و فى ناس بتدافع عن الحاجة بدون ما تفكر ولو للحظة إن ممكن تكون الحاجة دى حلوة بس عملت موقف\منتج مش حلو!

دى مجموعة ردود من قرّاء  مدوّنة آيفون إسلام على واحد قرر يقول رأيه بإن الجالاكسى S3 أحسن من الآيفون و إن أبل ما بقتش بتقدم إبداعات من بعد ستيف جوبز

 

التعليق الأصلى :

مافي شيئ جديد من يوم مات ستيف الحمدالله أني حاولت من نزل الايفون5 حولت الى جالكسي s III

الردود على التعليق ده:

رد كتب في :أكتوبر 23, 2012 كتب بواسطة :متعقب

كوكو …

الدنيا اتغيرت و أنت بعدك على جالكسي اس 3 ….. حبيبي سوقه طايح من زمان و أنا عندي جالكسي اس 3 ما يسوى شربة ماي هههههه

الحينة دور المنتجات الجديدة اللي اتغير العالم

-------------------------------------------------------------------------------------------

رد كتب في :أكتوبر 23, 2012 كتب بواسطة :LION

كوكو ممكن تسكت ، كل هاي وماكو شي جديد ، شتبي يخترعون صاروخ مثلا ؟ خليك مع السامسونج احسن

-------------------------------------------------------------------------------------------

رد كتب في :أكتوبر 23, 2012 كتب بواسطة :هاني

الله يقويكواعتقد ان الموقع اللي تشارك فيه اسمهاي-فون اسلام ماهو جلكسي اسلام

ما قصرتوا اي-فون اسلام الله يوفقكم على الخيرشكرا لكم على انجازاتكم وحبكم للخير

-------------------------------------------------------------------------------------------

رد كتب في :أكتوبر 23, 2012 كتب بواسطة :أمين المهلل

معليش اسمح لي … انت أكيد غير جاد في اللي قلته أو مانت عايش في ها العالم .. الشيء اللي apple أعلنت عنه اليوم أكيد مايقدر عليه حد…خليك مع S3 اللي مصنوع من نفس الماده اللي تصنع منه علب حليب المراعي

-------------------------------------------------------------------------------------------

بالمناسبة :

1.التدوينة نفسها حلوة و فيها معلومات قيّمة

2.إيه رأيك فى الحاجات اللى أبل أعلنت عنها النهاردة ؟

المصدر: http://www.iphoneislam.com/2012/10/apple-conference-ended-and-ipad-mini-unveiled/23125#ixzz2AASRqstj

اليوم اتخذت قرار من أصعب القرارات فى حياتى

اللهم إنك تعلم أنى فعلت ما استقر فى قلبى أنه الأصلح و أنه لا ظلم فيه لأحد و لم أضيع أحدا و تعلم أنى بذلت جهدا و وقتا فى التفكير حتى وصلت لقرارى هذا.
اللهم أصلح أحوالنا جميعا و اقدر لنا الخير حيث كان ثم رضنا به و أسعدنا بلقائك غير ظالمين لأحد من عبادك و تجاوز عن ما كان منا من خطأ و ارزقنا الحكمة
و حسن التصرف

I believe that Arabs Got Talent, many talents actually. Programming talents, Design talents, Business talents, Engineering talents. But unfortunately these talents aren't important for Arab audience. A hot chick is always better to watch, fund and support .. Millions of voters for hot chicks, paying millions of dollars. But to fund technology startups or young bright minds , that's not a will of our audience .. That's why we suck :(

23 SEPTEMBER 2008

النهاردة اتجننت فى عقلى و قلت أدخل مكتبة الكلية

لأ و قال ايه أستعير منها كتاب 

 قاللك أستعير 

المهم و أنا داخل المكتبة لقيت نظرة غريبة فى عيون أمناء المكتبة

لأ آسف ....السادة أمناء المكتبة

و بعد السلام عليكم

قلت لهم عايز أستعير كتاب 

ردت موظفة فاضلة و قالت 

كتاب إيه ؟؟

قوم أنا بذكائى أفتكر انها بتسأل على اسم الكتاب

قولتلها 

هابص على اسمه فى الإندكس 

و رحت أدور فى الإندكس اللى أحسن وصف ليه هى كلمة

معفن 

لأ كده أنا زودتها شوية

ممكن نعيد وصفه بصورة لائقة


ممكن نقول 
مالوش لازمة 

أو 

تأدية واجب ( أهو يبقى عندنا اندكس بردو ) ـ

و بعد فشل محاولات البحث اللى قمت بيها أنا و الرملى

لقينا أحمد والى بينده علينا و بيقول كتب لكمبيوتر أهه

رحنا و لسه بقرب على الرف 

لقيت الموظفة بتقوللى

رايح فين ؟؟ ....واحد بس اللى يبص 

قولتلها ليه 
قالت هو واحد بس

بعد ما والى خلص المدة بتاعته :) قلت أبص أنا بقى  ـ

قالتلى مش خلاص صاحبك بص ؟؟؟!!  

المهم نفضت لكلامها و بصيت على الكتب

الكتب معظمها قديم "موللة" ـ على رأى ميتالميدو ـ 

و بعد دقيقة من بداية مدتى لقيت الموظفة نفسها بتقوللى

فى كتب تانية فوق خاصة بكمبيوتر  

قولتلها طب لو عايز أستعير الكتاب ده  

قالتلى فى كتب تانية فى الدور التالت 

كررت السؤال

قالتلى

لازم يكون الكتاب اللى هتستعيره موجود منه 3 نسخ على الأقل فى المكتبة

:toot: 

و لازم تكون دافع مصاريف السنة دى
:toot: 

و مدة استعارة الكتاب 10 أيام

(مفيش توت تاخد أناناس )

أثناء الكلام ده كله كان الاخوة الموظفين الأعزاء قاعدين يتسايروا بدون شغل إطلاقاً

و كان اتنين سيدات منهم بيتكلموا على واحدة تالتة مش عارف هى مين ( ربنا يباركلها فى كمية الحسنات اللى أخدِتها )

فالظاهر ان زيارتنا أفسدت على الزميلة التالتة ليهم متعة الإستماع للحوار العظيم ده

أو التمكن من النوم بسلام 

الله أعلم

المهم 

- مش عارف هى من الهم أم من الأهمية -

طلعنا الدور الثالث

واحنا داخلين الموظفة قالت 

لو هتذاكرو المذاكرة تحت مش هنا :wizard: 

قولنالها مش هنذاكر

لقيت الكتب قديمة موللتين مش موللة واحدة

سألنا على الإستعارة

قالت

فور دوكتورز أونلى 

دول تحت قالولنا اطلعوا فوق 

قولنالها طب و الطلبة

قالت مسموح ليكم تصوروا منها 

لكن استعارة 

نو 

قولنالها ألف شكر

و فى سّرنا قولنا ( مش معتـبـيـنها تانى بعد النهاردة )

وسلملى على العلم و الإطلاع و الكلية و الكلام التعبان بتاع التليفزيون ده

دى كانت مغامرة النهاردة

و إلى اللقاء مع مغامرة جديدة

و لكم أرق التحيات

01 JANUARY 2009

بسم الله الرحمن الرحيم

كلنا تقريباً مهندسين و معظمنا هيشتغل فى مجال الهندسة و بعضنا لأ

مجال زى الهندسة بيفرض عليك تشتغل فى فريق .. والشغل فى فريق بيكون ليه شوية جوانب كدة

أنا عندى شوية ملحوظات بس ن الشغل فى فريق

أول حاجة

أل حاجة .. أنا شايل task يبقى أنا عارف و متأكد إن ما حدش غيرى هيعملها
و ده يتطلب إن الـ task دى تكون واضحة جداً و متحدد لها input و أوتبوت عشان الـ integration ما بين شغل الناس


تانى حاجة و دى بتضايقنى جداً ..
أنا النجم كبير .. 
حاجة رزلة جداً جداً .. لما تكون just عامل الـ task بتاعتك .. و فخور أوى و مش شايف حد غيرك فى الفريق

تالت حاجة .. 
إسكت يلا .. إيه الهبل ده
دى فعلاً مستفزّة جداً .. موضوع الحجر على الأفكار ده .. لو انت فى فريق خد بالك منها أوى
الشخص اللى انت بتقفله كل ما يتكلم ده ممكن يقوم يضربك 

رابع حاجة و دى تقريباً أهم حاجة 
هدفنا إيه؟ .. نجاح المشروع اللى إحنا فيه .. أو المنتج اللى احنا شغالين عليه .. أو حتى الفكرة اللى بندوّر عليها
يبقى أى حاجة فى مصلحة الفكرة أو المشروع ككل هى فى مصلحتى .. حتى لو كانت مش فكرتى 
مش مشكلة لما أقول فكرة و ما يتاخدش بيها .. المهم مصلحة المشروع فى الآخر
حتى لو اللى قال الفكرة شخص انت بتستغلسه 
خامس حاجة .. 
لما حد يقوم بالمهمة بتاعته على أكمل وجه .. اشكره .. سقف له .. إعمل أى حاجة تبدى بيها إعجابك بالشغل
هتفرق معاه جامد جداً جداً و هتفرق كمان مع باقى الفريق

سادس حاجة دى بقى خاصة بالـ effective meeting

لازم يكون فى Agenda 
لو هنروح ناكل فى أول الـ meeting تبقى مكتوبة فى الـ agenda

لو هناخد فاصل ربع ساعة نقول فيه نكت .. تبقى فى الـ agenda بردو

ده اللى فى دماغى دلوقت و للأسف فى أخطاء من دى وقعت فيها كتير


---------------------------------------------------------------------

عايز أقرأ شوية فى الـ team work ـ

31 MAY 2009

الكلام ده كتبته بعد الامتحان الفاينال لمادة نظم التشغيل فى قسم حاسبات و كنت متضايق جداً

بم تفسر

باب واحد من وسط 8 أبواب ييجى عليه 27 درجة فى الفاينال و 7 درجات فى الميدترم

و واحدة من أتنح جزئيات المنهج , و اللى الناس طالبت بإنها تتلغى تيجى فى الفاينال عليها 18 درجة من 90 ؟!! ـ

فاصل و نعود 

إبكوا معنا


==================================================

the person who lives in Hamburg is called Hamburger

plz one free Hamburger 

==================================================
عدنا

قاللك إيه بقى زمان كانوا بيحفّظونا

لكن دلوقت إحنا بطلنا الحاجات دى و مستوى التعليم بقى فى العلالا (المفروض العلالى : معلش خطأ مطبعى , إوعى تفتكر إن كان قصدى أقول البلالا أو البطاطا) ـ
المهم نرجع بـ backspace لورا 

آه التعليم دلوقت اتحسن كتير يا جماعة
بدال ما يحفظونا بقوا بيسيبونا نحفظ لوحدنا

فاصل إعلانى قصير و نعود
====================================================
الحفّاظة

عايز تقفل إمتحاناتك
عايز تجيب تقدير
مممممممممممممم .... أنا عندى الحل

الحفّاظة

تحفّظ معادلات , تحفّظ ألجوريذمات , تحفّظ شيتات ونظرى

مش كدة بس

المفاجأة الكُبرى

حفّاظة النهاردة غير أى حفاظة

دى كمان بتحفّظ رسومات يا جماعة

و حفّاظتنا صديقة للبيئة

و إوعى حد يقوللى ( اللى يصاحب البيئة يبقى بيئة ) : إكبروا بقى و بطلوا التفكير ده

كل ده بكام 

مش هتصدقوا 

من غير فلوس 

فقط اتصل على o9ooOsOs

و جاوب على السؤال اللى هتسمعه فى التليفون

و لو عرفت الإجابة يبقى انت مش محتاج الحفاظة

سعر الكارت ثابت سعر الخط ثابت , أينما كنت
=======================================

عدنا
كنا بنقول إيه .. كنا بنقول إيه
( مشاهد ظريف : شكله محتاج حفّاظة ) ـ

آه إفتكرت ( يعنى مش محتاج الحفاظة يا ظريف ياللى فى بالى ) ـ

كنا بنتكلم على إنهم بقوا بيسيبونا نحفظ لوحدنا

ده طبعاً بيخلى مستوى الطالب يبقى فوق فوق فوق يعنى

و بيزود إعتماده على نفسه و قدرته على تخزين المعلومات

و الحمد لله الإمتحانات اتغيرت كتيييييييييييييير

بقينا أكفأ ناس فى قياس قدرة الطالب على تحمُّل الضغط العصبى , و علمناه إنه يقدر يمسك نفسه قدّام سؤال مستفذ 
و خدنا رقم 1 على العاللم فى القدرة على قياس سرعة تفريغ الذهن للمعلومات , بعد أن ظل العالم حقبة من الزمن يحسبه من المستحيلات 

لقد .... ـ


طيب لقد جهز الأكل 

فاصل و نعود بإذن الله 

إبكوا هنا

لحد ما نيجى

فى الجزء القادم

مونيتور حبيبى اتكسر .. اديته سيمافورى

19 JUNE 2009

هل تعتقد إن رافائيل نادال أو فيدرير بيلعبوا تنس عشان الفلوس؟؟

هل تعتقد إن يَنّى بيعزف موسيقى عشان الفلوس؟؟

طب ليه دول نجحوا رغم إن هدفهم الأول مش بيبقى الفلوس؟؟

كان فى حكمة بتقول " حب ما تعمل إن لم تعمل ما تحب " ـ

مش عاجبانى الصراحة و هاقول

إعمل ما تحب .. و كلما إزددت له عشقاً .. ستجعل الكون كله يحب أن يشاهدك و أنت تعمله

الحب هو رقم 1 , لو كنت بتحب حاجة فضولك هيزيد ناحيتها هتتعلق بيها و هتركز عليها و حبك ليها ده هو اللى هيدفعك فى مشوارك نحو تحقيق الهدف (اللى هيتجدد باستمرار)

أحد المخترعين كان بيقف قدام معارض الآلات الميكانيكية يتفرج على الآلات دى .. كان بيتكلم معاها .. كانت بتتكلم معاه .. بس بلغة ما حدش يفهمها غيرهم .. كانوا كتير بيفتكروه مجنون .. بس هو ماكانش شايفهم أصلاً


طيب بعد الحُب ده ؟؟

ليس بالحُب وحده يحيا الإنسان

اللى بيحب حد .. بيبقى مشغول بيه

لو حبيت حاجة .. إشغل نفسك بيها

إشتغل .. إشتغل .. إشتغل

ركز .. ركز .. ركز

و بعدها .. ساعد الناس من خلالها بدون انتظار مقابل

ساعتها هتعرف الفلوس و حب الناس ليك بيجوا منين


طيب نيجى للصعوبات اللى هتقابلنا

قبل ما تحقق حاجة كتير بيقول لك مستحيل

علرف : لو انت قلت لنفسك مستحيل , هيبقى مستحيل , آه والله

كان فى ألعاب القوى بيعتقدوا إن مستحيل حد يقطع مسافة 100 متر فى زمن أقل من ** ثانية و يفضل عايش

و كانوا اللاعبين مصدقين الكلام ده

لحد ما لاعب واحد قال هم قاسوا الكلام ده على قدراتهم .. مش قدراتى .. و اتدرب لحد ما فعلاً كسر الرقم ** ده

بعدها بفترة وجيزة جداً ..كذا لعيب غيره كسروا الرقم ** ده و كسروا رقمه هو كمان

طب إيه اللى كان موقّـفـهم قبلها؟؟

إعتقدوا إن ده مستحيل ..

من القصة دى لازم تخلى فى بالك إن إنت اللى بتحط تعريف كلمة مستحيل لنفسك

و بالتالى أكبر عدو ليك فى سبيل الوصول للإنجاز ده هو الـ CRAP ـ
CRAP :

Criticism : I am not smart enough, I did many mistakes before, people in my community are idiots and won't accept such idea , " you are idiot" x

Rejection: when they say "Actually we don't need this invention" or " thanks , but this idea will cost us much to implement " , bla bla bla

Assholes: Those who always say " Impossible " or " Who do you think you are ?? , there's no SuperMan " , etc

Pressure: avoid it by visualizing the end in your mind , and of course doing what you love will make pressure handling be an easy task 


شوية حاجات بافكّر نفسى و بافكّرك بيها

لما بتحقق إنجاز ما حدش بيسألك : نسبة ذكاءك كام؟؟

لما بتحقق إنجاز كل اللى كان بيقول مستحيل .. بيقعد يسقف .. و بيدور على حد تانى غيرك يقول له مستحيل

لما تقع .. قوم بسرعة و ما تبصش حواليك .. الطفل الصغير لما بيقع .. بيقوم بسرعة يكمل مشى .. و يقع تانى .. و يقوم تانى .. لو عشت بروح الطفل ده .. هتعيش مبسوط .. اللى هيضحك عليك ده يدخل فى فئة الـ Assholes اللى انت هتنفضلهم أصلاً

إدعى كتر إن ربنا يثبتك و يوفقك و استعين دايما بربنا

و بعد الإستعانة كل شئ هينٌ و دون الاستعانة تعظم الأسبابُ

ربنا يرزقنا القوة و الإرادة

24 JUNE 2009

طبعاً لما الواحد يكون معاه فلوس ده شئ جميل

فكرت فى كذا طريقة لصناعة الثروة

الحقيقة فى الوقت اللى فات ده معظم اللى حقق ثروة ما حققهاش نتيجة بيع حاجة ملموسة

بمعنى آخر .. معظم أغنياء العالم الجدد , باعوا أفكار و بيبيعوا خدمات

نضرب مثال مشهور

مارك .. صاحب الـ facebook و مؤسسه .. 

جت له فكرة حلوة .. و هى إنه يعمل موقع إجتماعى مختلف و يخدم بيه الناس فى الجامعة بتاعته ..الموضوع كبر لحد ما بقى الموقع ده من أذكى المواقع على الإنترنت كلّه

جووووووجل .. بتكسب بشكل بشع من الإعلانات على الإنترنت .. بغض النظر عن اللى حصل لى قبل كدة .. لو عايز(ة) تعرف(ى ) تفاصيل راجع(ى) الكاتيجورى ( اللى فات مش هيرجع ) و انت(ِ) تعرف(ى) قصدى

المهم .. من أكبر شركات العالم ربحاً على مستوى العالم كله هى شركات الاتصالات 

تفتكر(ى) ليه ؟؟

الهاردوير متركب خلاص .. و الناس بتتكلم .. و الناس بتحب تتكلم .. و كل ما تحبب الناس فى الكلام .. جيبك هيتملى أكتر

و هكذا .. باختصار .. أنا شايف إن اللى عايز يعمل ثروة سريعة .. لازم يبقى عنده خلفية عن مجال تكنولوجيا المعلومات 

أو يبقى عبقرى و مبدع فوق الوصف 

على فكرة ممكن واحد بيعرف يصوّر كويس

ياخد لقطة لمشهد عادى .. بشكل غير عادى .. يبيع الصورة أونلاين ( يعنى بردو ما أعطاش المشترى سلعة فى إيده ) بمبلغ كبير .. لمجرد إن هو عبقرى و عرف يستغل موهبته

طبعاً أولاً و أخيراً الرزق بإيد ربنا سبحانه و تعالى 

بس ربنا أعطانا العقل عشان نفكر بيه

ومن ضمن الحاجات اللى المفرووض تفكر فيها هى إزاى تعمل فلوس

بالمناسبة .. موضوع الفلوس لا يتعارض مع موضوع حبّك للمجال اللى هتشتغل فيه

لإنك لو مش بتحبه .. صعب تبدع فيه بدرجة تشد الناس ليه بشكل مستمر

لو حد عنده أفكار لصنع الثروة .. أو يحب يصحح حاجة أنا كاتبها .. يقول 

السلام عليكم

منقول من مدونتى القديمة بتاريخ 20 أكتوبر 2009

الواحد شخصيته اتطورت كتير و لله الحمد و بقى فى معايير كتير بيقيس بيها النجاحمش عارف ليه اليومين دول عقلى مشغول بموضوع الـ mony maikng ده
رغم إننا مش فاضيين ولا حاجة ولا المناهج مريّحة ولا الدراسة واقفة بل بالعكس إحنا بقينا فى ch5 database , ch3 networks , ..... 
بس الموضوع مسيطر على تفكيرى بردو

يمكن موضوع الهندسة نفسه مسيطر على تفكيرى

باسال نفسى شوية أسئلة كدة
هل شهادة الهندسة تستاهل التعب اللى الناس بتتعبه عشن تحصل عليها؟

و عندك اسئلة بقى من نوع
what kind of business should you do to have a ###؟
ممكن تحط مكان الـ ### دول رحلة حج كل سنة أو جيب شيروكى أو فيلا فى مدينتى أو شاليه فى مارينا أو شقة فى تركيا أو اللى نفسك فيه

حاسس إن الهندسة مش هى المهنة المُثلى للوصول للحاجات دى
السؤال بقى , إيه المهن التانية اللى بتكسّب فلوس حلال و تقدر تحقق الحاجات دى؟

نضرب مثال لموضوع الهندسة 
شباب حاسبات الكويسين .. نسبة منهم بتفكر تشتغل فى شركة Mentor Graphics و بيحلموا بقى بالشغل فيها و الكلام الحلو ده
اللذيذ فى الموضوع هو إنك لو اشتغلت فى منتور فانت هتشتغل حوالى 10 ساعات فى اليوم من 9 صباحاً لـ 7 مساءاً و فى الغالب هتضطر تحضّر ماجيستير لأن معظم زمايلك هناك هيبقوا معاهم ماجيستير و حياتك هتبقى مووز مووز مووز 
كل ده فى سبيل الحصول على مرتب شهرى إلى حدٍ ما كويس (و مش كبير قوى) مقارنة بباقى الوظائف الهندسية فى الشركات التانية

بس بردو فى وظائف مش هندسية و دخلها مووز مووز مووز برتقال مانجو جوافة عنب ... و كل اللى نفسك فيه

السؤال بقى و الواحد طالب كدة إزاى يبدأ مشوار الموز ده (علماً بأن مشوار الموز يبدأ بقشرة ) ؟
ممكن تكون القشرة دى إن جوجل تقفل حسابك بتاع الإعلانات مثلاً مثلاً يعنى